Вавож

Википедиысь материал
Перейти к навигации Перейти к поиску

Вавож черкогурт кылдӥз XIII-XIV дауръёсы. Татаро-монголъёслэсь пегӟыса, удмуртъёс вуизы туж шулдыр Ва (али Ува) шур котыре. Ӵапак та интыосын Ва усе Вало шуре. Та бордысь ик потӥз черкогуртлэн нимыз но — Вавож. Но пусъёно: солы мукет но нимъёс малпаллязы. Кылсярысь, Вавож-Можга, Николаевское.

Вавожысь Свято-Никольской черклы 170 арлэсь кема ини. Солэн тусыз бордын тыро-пыдо тыршиз Ижысь пыӵал тӥрлык поттонъя заводысь тодмо архитектор С. Дудин. 16-тӥ сентябре 1835-тӥ арын черклэсь нырысетӥ этажзэ дун-чылкыт вуэн пазязы. Татын трос баӵкоос ужазы. Пӧлысьтызы огез Удмуртилэн историяз бадӟым пытьы кельтӥз. Со — Михаил Елабужский, 1912-тӥ арын Ува ёросысь Удугучин гуртысь Вавоже улыны лыктэм. Никольсклй черкын удмурт сямен чирдэм сяна, та воргорон мыло-кыдо выриз этнографиен, нуиз дневник, тодӥз пӧртэм кунсьӧр кылъёсты. Но улон нюжаез Михаил Стефановилэн туж но туж секыт вал: нырысь ик сое коркаысьтыз уллязы, кивалтӥсьёс черксэ пытсаны вырылӥзы, бӧрысь Елабужскиез воксё кулаке поттӥзы, висись пересез ыстӥзы нюлэс коранэ… Отец Михаил Вавоже берытскиз на кулон азяз гинэ. 1937-тӥ арын черкез ворсазы.

Михаил Стефанович юн эшъяськылӥз Меньшикова сузэеръёсын-дышетӥсьёсын. Соос ужазы Удмурт шаерысь тужгес вашкала школаын — черкогуртысь церковно-приходской школа усьтӥськиз 1842-тӥ арын. Вунэтоно ӧвӧл: ӵапак та сузэръёс ик шедьтӥзы егит югдытӥсез, кылбурчиез Кузебай Гердэз. Сютэм улонэн сэрен К. Герд коркась корка кураськыса ветлоно луылӥз. Меньшиковаосын пумиськемез бере сое сюдӥзы-миськизы. Озьы со школаысь тужгес усто дышетскисьлы пӧрмиз.

Вавож черкогурт Сылэ Ува но Вало шуръёс вискын. Черкогуртлэн шорсюлмыз интыяськемын гурезь йылын. Макем трос татын XVIII даурын пуктэм йыг-йыг юртъёс! Кылсярысь, огаз сыӵе коркае «каръяськиллям» ёросысь югдурез утисьёс. Паймымон соиз но: Вавожын туж трос уло Азербайджанысь вуэмъёс.

Вавож черкогурт вашкала дыръёсы тодмо луылӥз вуз каронэныз. Татын огыр-бугыр радъяськылӥз Вавожско-Никольской ярмарка. Соин ик Вавожын трос вуз карон юртъёс сылӥзы. Вал асьсэлэн драмтеатрзы но. Спектакльёс, концертъёс ортчылӥзы азьло вина возён интыын.