Удмурт сиён-юонъёс

Википедиысь материал
Перейти к навигации Перейти к поиску

Удмуртъёс вашкала вакытъёсы нюлэсъёсын улӥллям.

Кыр тылобурдоосты, пӧйшуръёсы кутылыса, бадӟым но пичи шуръёсысь чорыгаса, турын-куар но соослэсь выжыоссэс бичаса, узы-боры но губи октыса, сиён-юон пӧраллям. Собере нюлэсъёсты сайкыны дышиллям но вазь, ӟег, чабей, йыды, сезьы, кӧжы но мукет тысё будосъёсты, бакча сиёнъёсты но емышъёсты будэтыны ӧдъяллям, пумен пудо-но вордыны кутскиллям. Аръёс ортчемъя сиён-юонъёс воштӥськылӥзы ке но, азьвыл сямен ик пӧртэм кеньыръёслэсь пӧрам ӝукъёсты ӝӧк вылысь ӵемысь адӟыны луэ. Сиён-юонъёсазы озьы ик турын-куаръёсты, кыр емышъёсты, узы-борыосты, губиосты, шур чорыгъёсты ӵемысь куто. Нош табань, перепеч, пельнянь тужгес но сӥлы сиёнъёс луизы. Пыжем тылобурдо сӥльтэк но удмуртъёслэсь ӝӧк вылзэс син азе пуктыны шуг. Ӝӧк вылазы табере мурт шаерын будэтэм-лэсьтэм чай кузёяськыны ӧдъяз ке но, палэнысь лыктэм дуно кунооссэс, вашкала сямен ик, турын-куар чаен, ческыт сюкасен, аръянэн, аракыен, пӧсятэмен, мусурен утялтыны тыршо.