Брангуртысь песянайёс

Википедиысь материал
Брангуртысь песянайёс

Брангуртысь песянайёс (ӟуч Бурановские бабушки) — Удмурт Республикаысь профессионал луисьтэм кырӟасьёслэн коллективзы. Отчы пыро Пичи Пурга ёросысь Брангуртын улӥсь пересь кышномуртъёс, соин ик со «Брангуртысь песянайёс» шуыса нимаське. «Брангуртысь песянайёс» тужгес тодмо луиллям ӟуч но дуннеысь шлягеръёсты удмурт кылэ берыктыса кырӟаменызы.

2010 аре март толэзе «Брангуртысь песянайёс» Россиысь «Евровидение» конкурсын куинетӥ интые потӥзы «Евровидениын» вормемзы понна Удмурт Республикаысь Кун Кенешлэн Тӧроез А. В. Соловьёв оскытӥз: Брангуртысь песянайёслэсь котькыӵе куронзэс быдэстоз — гуртэ газ, ву гумыос кыскоз. Ма, сюресъёссы но ушъяськымон ӧвӧл. Ижозь 35 иськем. 2012 арын коллектив пыриськиз нош ик Россиысь «Евровидение» конкурсэ «Party for Everybody» кырӟанэнызы. Татын «Брангуртысь песянайёс» вормисе потӥзы но луонлык басьтӥзы Россияез «Евровидение» конкурсын калык азе поттыны. «Евровидение»-2012 конкурсын, кудӥз ортчиз Баку карын, песянайёс кыкетӥ инты басьтӥзы.

Удмурт Элькунлэн президетэзлэн указэзъя (№ 97 24.05.12 ) тямыс песянайёслы (Граня Байсарова, Алевтина Бегишева, Зоя Дородова, Галина Конева, Наталья Пугачёва, Валентина Пятченко, Ольга Ту́ктарева и Екатерина Шкляева) "Удмурт Элькунысь калык артист" даноним сётэмын. Коллективлэн продюсерзы —Ксения Рубцова.

Брангурт песянайёс пӧлысь тужгес арлыдоез — Зарбатова Елизавета Филипповна. Ӵапак солэн кырӟанэз ик — «Веськрес тӧдьы кызьпу туйлэсь…» чузъяськиз «Евровидениын» но. Баянэн шудӥсьсы, гитара сиосты кырӟатӥсьсы — Николай Григорьевич Зарбатов.

Йӧспӧртэм мӧйыос котырысь уг кошкыло иворчиос. Удмурт шаерысь сяна, Мускоысь, Санкт-Петербургысь но журналистъёс доразы кожалляло. Микрофонлэсь, камералэсь кырӟасьёс чик уг кышкатско — доразы кожем куноосты я скал гидэз сузяны потто, я киязы лопата мычо. Тужгес но огыр-бугыр вераськонъёс мыно Интернетын. Брангуртысь песянайёс Россиын улӥсьёслэсь сюлэмъёссэс зол позыртыны быгатӥллям.

Песянйёслы аспӧртэмлыко дуннее — сцена вылэ — нырысетӥ вамыш лэсьтыны юрттӥз «Юмшан Промо» группалэн кивалтӥсез Павел Поздеев. 2004-тӥ арын Ижысь Шор площадьын «Перепеч — пиццалы пумит» акциез дасякуз, тодмо режиссёр но шоу радъясь Поздеев ӧз но вӧталля таӵеез сярысь.

Коллективлэн кивалтӥсез — Ольга Николаевна Туктарёва — капчи сямо, котькыӵе ужрадъёсы мыло-кыдо пыриське. Экспериментъёслэсь кышкамтэзы, выльзэ утчамзы соослы выль но выль вормонъёс ваё.

Брангуртысь песянайёс удмурт калык кырӟанъёсты быдэсъям сяна, мыло-кыдо гурлало, кылсярысь, «Битлз» группалэсь, В. Цойлэсь гуръёссэс. Вашкала кырӟанлы туала шӧмо аранжировка лэсьтыса, та усточиослэн куараоссы эшшо но аспӧртэмлыко чузъясько. Песянайёслэсь кырӟанъёссэс шедьтыны луэ YOU TUBE (сайт) сайтысь. Паймоно кадь: «Евровидение» ортчем бере соослэсь куаразэс кылзыны та сайтэ пырам 69 сюрс адями. Асьсэос кырӟасьёс шуо:

- Ми артистъёс-профессионалъёс ӧвӧл ке но, та ужмес туж юн яратӥськомы но гажаськомы.

Коллективысь мӧйыослы 70-80 арес. Брангуртысь песянайёсты котькытын шуныт пумитало, куное ӧтчало. Трос пол соос кунгож сьӧры потазы ини. 2009-тӥ арын брангуртъёс пусйизы коллективзы кылдэм дырысен 40 ар тырмонэз.

Чӧлсконъёс[Тупатыны | вики-текстэз тупатыны]