Вавож ёрос

Википедиысь материал
Вавож ёрос
Герб Флаг
Вавож ёрос Удмуртилэн карта вылаз
Центр Вавож
Улӥсьёс
 - ваньмыз 18 000
 - плотность 10,7 адями/км²
Территория
 - ваньмыз 1679 км²


Вавож ёросУдмуртиысь ёрос. Центрез – Вавож.

Вавож ёрос интыяськемын Удмурт Республикалэн шундыпуксён палаз. Уйпаласен Вавож герӟаське Сюмси ёросэн, шундыӝужанысен - Ува ёросэн, лымшорысен - Можга ёросэн, шундыпуксёнысен - Киров улосэн.

Ёрослэн огъя площадез - 167 сюрс 899 гектар. Ёрослэн уйпалыз интыяськемын Центрально-Удмуртской низменностьын, лымшор палыз - Можгинской возвышенностьын. Ёросэтӥ бызё Вало, Инга, Ува, Кылт шуръёс, трос тыметъёсыз но тыосыз. Тужгес бадӟымез тымет Брызгаловоын - 134 гектар музъем вылын.

Ёрослэн кылдэмез[Тупатыны | бамлэсь кодзэ тупатоно]

Вашкала дауръёсы та музъемъёс вылын улӥллям Юсь, Можга, Докья, Пельга, Котъя, Уча, Монья, Бия выжыос. Вавожъёс сярысь нырысьсэ вераськонъёс вӧлмиллям 1716-тӥ арын.

XIX даурын кылдӥз выль волость. Шорсюлмыз луиз Вавож. Татын ӧй вал помещикъёс. Соин ик крестьян калыкъёс гань-гань ужазы музъем бордын. Но, Вавож волость Кам заводъёслэсь кыдёке интыяськемын вал ке но, завод ужлэсь соос пегӟыны ӧз быгатылэ.

Вотка автономной область кылдэм бӧрсьы та волость пыриз Можга уездэ. Нош 1924-тӥ арын Вавож, Водӟимӧнья, Ува-Тукля волостьёсты огазеязы Вавожской волостной районэ.

1929-тӥ арын уездъёс быризы, нош волостной районъёс интые кылдӥзы административной ёросъёс. Вавож ёрос кылдӥз 15-тӥ июле 1929-тӥ арын. Соку отчы пыризы азьвыл Малмыж уездысь 6 волостьёс: Вавожской, Водзимоньинской, Волипельгинской, Большеучинской, Ува-Туклинской, Тыловыл-Пельгинской. Ваньмыз-ӧвӧлэз 20 сельсоветэз вал.

Улӥсьёсыз[Тупатыны | бамлэсь кодзэ тупатоно]

2009-тӥ арын 1-тӥ январльы ёросын 17 сюрс 314 улӥсез вал. 2010-тӥ арын - 18 сюрс 456 адями. Улӥсьёсызъя республикаысь ёросъёс пӧлын 17-тӥ инты басьтэ. 2002-тӥ арын ортчытэм переписья Вавожлэн музъем вылаз уло удмуртъёс - 56,6%, ӟучъёс - 39,4%, татаръёс - 1%, музон калыкъёс - 3%. Озьы Вавож ёрос пыре шаерысьтымы 16 тужгес удмурто ёросъёс пӧлы.

Кивалтэт[Тупатыны | бамлэсь кодзэ тупатоно]

Ёрослэн вань аслаз Уставез, муниципал кылдытэтъёсыз. Депутатъёслэн ёрос кенешазы пыре 33 депутат, депутатэ быръёнъёс ортчыло вить арлы быдэ. Ёрос муниципал кылдытэтлэн йырыз - Березин Вячеслав Иванович. Вавож ёрос муниципал кылдытэтлэн администрациезлэн йырыз - Иноземцева Татьяна Васильевна.

Туннэ нуналлы ёросын 69 населённой пункт лыдъяське. Соос огазеямын 10 гурт поселение: Вавож, Водӟимӧнья, Тыловыл-Пельга, Какмож, Нюрдор-Котья, Ӟямбай, Гурезь-Пудга, Волипельга, Брызгалово, Большеволково. Ёрослэн бюджетэз 2009-тӥ арын: доходъёсыз - 371 сюрс 339 манет, расходъёсыз - 371 сюрс 947 манет. Бюджетлэн бадӟым люкетэз кошке ЖКХ, дышетон, культура, тазалыкез утён, улон-вылонын юрттэт сётон удысъёслы.

Вавож ёрослэн кунпусаз куинь символэз вань: чагыр буёл вылын адско нюлэс но ю шеп. Угось ёрослэн экономикаез быдэак герӟаськемын гурт удысэн но нюлэс хозяйствоен. Нош чагыр буёл возьматэ ошмесъёсын, шуръёсын узыр музъемзэс.

Дышетон но культура[Тупатыны | бамлэсь кодзэ тупатоно]

Вавож ёросын ваньмыз-ӧвӧлэз 35 дышетон учреждение: 17 школа, 16 нылпи сад, ватсаса тодон-валан сётонъя 3 центр. Татын визь песьтэрзэ будэтэ 3 сюрслэсь трос пианл, соосын ужало сюрслэсь уно дышетӥсьёс. 2007-тӥ арын Вавож черкогуртысь школа вормисе потӥз инновациослы сӥзем программаосты улонэ пыӵатонъя конкурсын. 2006-2009-тӥ аръёсы 8 дышетӥсь «Россиысь дано дышетӥсь» конкурсын лауреат луиз.

Озьы ик ёросын вань 23 культурая юрт, 18 библиотека, краеведениея музейёс. 6 самодеятельной коллектив калык ним басьтӥз - кыӵе гинэ но ужрадъёсы соос уг пыриськыло! «Гуждор», «Гербер», «Пичи гуждор», «Радуга», «Дружба», «Улыбка» ансамбльёсты тодӥсьтэмез ик ӧвӧл, дыр. 2008-тӥ арын ёрос библиотека республикаямы ортчись «Большое чтение» конкурсын вормисе потӥз.

Югдытӥсьлы Кузебай Гердлы (Кузьма Павлович Чайниковлы) сӥзем музей Вавож ёрослэн пусэз выллем луэ. Со усьтӥськиз 1998-тӥ арын - Гердлэн вордӥськемез дырысен 100 ар ортчем бӧрсьы. Музей-коркан Чайников улӥз-вылӥз, дышетскиз, ужаз. Отчы пырыса, син азе яркыт пуксе удмурт калыклэн кылем дауръёсы улэм-вылэмез. Экскурсиос ортчыло удмурт но ӟуч кылын. Шаерысьтымы сяна, К. Гердлэсь юртсэ адӟыны вуыло кунгож сьӧрысь но куноос.

Ёросын дышетон удыслэн кутсконэз герӟаськемын 1842-тӥ арен. Соку Вавожын усьтӥськиз церковно-приходской школа. Ӵапак татын ик тодон-валанзэ муромытӥз тодосчи Кузебай Герд, авиациысь маршал Фёдор Фалалеев.

Тазалыкез утён[Тупатыны | бамлэсь кодзэ тупатоно]

2008-тӥ арын Вавожысь ёрос больница пусйиз усьтӥськемез дырысен 140 ар тырмонэз. Татын вань стационар, 4 амбулатория, 19 фельдшерско-акушерской пункт. Та эмъян юртъёсын ужа 42 врач, 172 эмсузэр.

Гурт удыс но промышленность[Тупатыны | бамлэсь кодзэ тупатоно]

Гурт удыс - валтӥсь инты басьтэ ёрослэн экономикаяз. Берло аръёсы, мукет ёросъёсын ӵошатыса, та удысъя соос азьпал радын мыно. Ёросын ваньмыз-ӧвӧлэз 12 кооператив, отын тырше 2 сюрслэсь ятыр адями. Усто тыршо Мичурин нимо, «Колос», «Удмуртия», «Луч», «Зарни Луд», «Жуе-Можга» эштосъёс. 50-лэсь трос дояркаос котькуд скаллы быдэ кыско 6 сюрс литрлэсь уно йӧл.

Туннэ ёросын ужа промышленностья кӧня ке огазеяськон: «Какможлес», «Вавожлес», «Нюрдор-Котья», «Сайдинг». Одӥгъёсыз нюлэсэн выро ке, мукетъёсыз тыршо гыбед поттонын. Вавож палъёсы чагыр эстӥськон кысконъя но ужъёс огсыр мыно. Берло кык ар куспын 130 километр газопровод нуйтэмын.

Спорт[Тупатыны | бамлэсь кодзэ тупатоно]

Ёросын тужгес бадӟым саклык висъяло нылпи спортлы. Та ласянь ӟеч тырше Вавож ДЮСШ. Отчы ветлэмъёс тросэз спортъя мастеръёс, эрико нюръяськонъя Приволжской федеральной округысь чемпионъёс луо ини: Тимур Аллакулов, Владимир Аллакулов, Виктория Кочнева. С. Каргашин тренерлэн дышетскисьёсыз - Николай Лебедев, Татьяна Протопопова, Екатерина Лебедева, Андрей Голубьев - шаерысьтымы куасчиослэн сборноязы пыро. Денис Кокорин, Анна Евстафьева, Виталий Коротаев - Иван но Никита Рябовъёс, Мария Чуб - капчи атлетикая кужмо усточиос. Арлы быдэ школаын дышетскисьёслы А. Мезринлы сӥзем спартакиадаос ортчыло. Та сяна, егитъёс мыло-кыдо пырисько Тол но Гурт шудонъёсы. Кылсярысь, 2009-тӥ арын спортсменъёс Тол но Гужем президент шудонъёсын 3-тӥ инты басьтӥзы.

Чӧлсконъёс[Тупатыны | бамлэсь кодзэ тупатоно]