Гербер
Гербер, Гершыд (мукет нимъёс: геры бере, геры шыд) – Гужем нунал берытскон вакытэ, музъем ужъёс бырем бере, удмурт гуртъёсын шулдыр юондыр-юмшан ортчытъяллям. Калыкмес Христос Инмарлы вӧсяськыны пыртэмзы бере, соослэн та вашкала юмшанзы интые, черк Петро нунал шуиськись праздниксэ пусйыны косэ. Мукет праздникъёсы сямен ик, та нуналэ нырысь вӧсяськиллям, йыр-пыд сётонъёс ортчытъяллям, собере вӧсь нерге ветлӥллям. Туала вакытэ куд-ог гуртъёсын та юмшан луэ гырон быдтон праздник бере одӥг арня ортчыса но кыстӥське 5 – 7 нунал. В. Е. Владыкинлэн ивортэмезъя, рос-прос языческой сямъёс возисько на Удмуртиысь Алнаш ёросысь Кузёбай гуртын но Татарстанысь Огырчи (Агрыз) ёросысь Варклед-Бӧдья гуртын.
Татарстанысь Варклед-Бӧдья гуртоос верамъя, вирнуналэ праздникез кутскыны уг яра. Нырысетӥ нуналаз мӧйыос узьым кизем бусые мыно. Отын соос вӧсясько, сьӧразы ваем няньзэс но нӧкы вӧйзэс вӧсяло, собере соосыз музъеме копало, ю-нянь мед удалтоз шуыса. Кыкетӥ нуналаз мыно вӧсяськыны юри котыртэм интые, сьӧразы озьы ик нуо нянь но вӧй. Татын тылско, нош ик вӧсяло ваем сиёнзэс. Ваньзэ тае бинялто тӧдьы етӥн ӝоккышетэ, кудзэ трос ар талэсь азьло куизы юри таче вӧсяськонъёслы. Нянез но вӧез нуназе бере ваё быръем интые но кельто соосты ӝытозь выль кызьпу вайёсын вӧлдэм турын вылэ. Та вайёсыз котькуд нунал вошъяло. Уж бере та котыртэме быдэс гурт люкаське. Нылкышноос дӥсяло юмшан удмурт дэремъёссэс, пиосъёс но воштӥськем дӥсенызы вуо. Одӥгзылы но йыртэмпол лыктыны уг яра. Вӧсям нянез но вӧез доразы нуо, соосыз быдэс семья куспын люко. Куинети нуналаз лым пӧзьто, солы вандо така яке ыж. Таяз учыре но нянь но вӧй вӧсяло. Тылско мукет тупатэм интыын. Вӧсясь котькуд нунал вошъяське. Сое азьвыл ик быръё. Ньылетӥ нуналэ Мукылчинлы сьӧд така вандо, ӝук пӧзьто. Лыоссэ, йырзэ но пуштӥрлыкъёссэ музъеме гудо. Ӝытазе татчы быдэс гурт люкаське. Витетӥ нуналэ – йыбырттонэ – Инмарлы ыж но кык ӟазег вандо, нош ик лым пӧзьто. Вӧсьсы бере вӧсясь пуньыен лымез тылскеме кисьта, отчы ик сӥльзэ но кӧня ке куя. Та нуналэ ик кылем арлэсь вайёсты но куаръёсты куинь тыскемъёсын суто. Вань лыктэмъёс черодэн соос доры матэ кариськыса йыбыртто. Собере ортчытӥське люгезь вӧсян – котькуд юртысь бичам уксёез вӧсян. Со коньдон сётиське пудо-животсэ вӧсяны висъясь адямилы. Куатетӥ нуналэ – Акташ вӧсяськонэ – вань люкаськемъёслы сӥлен куарняньёс сётъяло, сӥль лымын ӝук пӧзьто, дэмен сиё соосыз. Бергес куарняньёсыз нуо кыз выжые но йыбыртъяло отын. Собере, соосыз басьтыса, доразы берто. Сизьыметӥ нунал – куяськон – берпуметӥ. Соку ош вандо, но уг ни вӧсясько. Пӧзьто сӥль лымын чабей ӝук. Кызъёс выжые куяло пудо-животсылэсь лыоссэ но кӧня ке пуньы ӝук. Котькуд семья буре вае аслэсьтыз кулэм чыжы-выжыоссэ.
Ошмессин
[Тупатыны | бамлэсь кодзэ тупатоно]- Владыкин В. Е. Религиозно – мифологическая картина мира удмуртов. – Ижевск, 1994.