Иж

Википедиысь материал
(Ыстэмын «Ижкар» бамысь)
Удмурт Республикалэн шоркарез
Иж кар
Ижевск
Флаг Герб
Флаг Герб

Координатаос: 56°51′00″ у. ш. 53°13′00″ ӵ. д. / 56.85° у. ш. 53.216667° ӵ. д. (G) (O) (Я)56°51′00″ у. ш. 53°13′00″ ӵ. д. / 56.85° у. ш. 53.216667° ӵ. д. (G) (O) (Я)

Шаер Россия
Улос Удмуртия
Йыр Александр Ушаков
Кылдытон дыр 1760
Территория 315,6 км²
Улӥсьёс (2016) 643 496 адями
Плотность 2019 адями/км²
Агломерация 1 253 730 адями
Йӧскалык состав ӟучъёс, удмуртъёс, бигеръёс но мукетъёсыз
Часовой пояс UTC+4
Телефон код 3412
Почта индексъёс 426000 — 426999
Официальной сайт izh.ru

Иж кар (Удмуртия)
Иж кар
Иж кар

Иж кар (озьы ик Ижкар, Завод, ӟуч Ижевск) — Удмурт шаерлэн шоркарез. Интыяськемын Элькунлэн шораз — Ватка но Кам шуръёс вискын, Оӵ шур дурын.

Историез[Тупатыны | вики-текстэз тупатыны]

Валтӥсь статья: Иж карлэн историез

Ижкар кылдӥз 10-тӥ оштолэзе (апреле) 1760-тӥ арын.

1760Пётр Шувалов графлэн кичӧлтэмезъя Оӵ (ӟуч сямен Иж) шур дурын корт поттон заводэз лэсьтыны кутскиллям; со бордын кылдӥз вуоно Иж кар – Ижевской Завод (соин ик али но Дэри ёросысь пересьёс сое Завод, Заод шуо на).

1918, 21 тулыспалэ – Ижысь ужчиослэн, салдатъёслэн но кресьянъёслэн депутатъёссылэн Кенешсы Ижевской Завод посёлокез каре пӧрмытӥз. Со дырысен сое ӟуч сямен Ижевск шуыса официально ниманы кутскиллям (ачиз со ним кылдӥз вазьгес).

Кызетӥ-куамынэтӥ аръёсы Ижез удмурт гожъясьёс пӧртэм сямен нимало вал. Ваньмызлэсь ӵем уже кутыло вал Ижкар шуон кылэз. Калык вераськонын пумиськисьтэм со ним Удмуртилэн уйпал ёросъёсаз интыяськем нимо-дано Иднакарлэн, Дондыкарлэн но мукет вашкала улон интыослэн нимъёссылэсь адӟем карыса малпамын вал.

1984, 27 толсуре (декабре) КПСС-ысь вылӥ кивалтӥсьёслэн кичӧлтэмзыя карлэн нимыз воштэмын вал: алигес улонысь кошкем СССР-ысь утиськонъя министрлэсь Устинов, Дмитрий Устиновлэсь нимзэ пыраклы тодэ вайытон понна, Ижез Устинов шуыса ниманы косӥллям. Министр Устиновлэн ужез Быдӟым Отечественной ож (война) дырысен ини зэмзэ но юн герӟаськемын вал Ижкарысь ож заводъёслэн уженызы. Озьы ке но, ваньмыз сямен ижъёс карзылы калыклэсь чик юатэк выль ним сётэмлы туж пумит луиллям.

1987, 19 инвожое (июне) Устинов карлы вуж нимзэ берен сётӥллям. Со дырысен сое ӟуч сямен нош ик Ижевск шуо, удмурт сямен нош Удмурт литературной кыл|гожтос кылын – Ижкар яке Иж.

Ижкарысь Дума Ижкарлэн кунпусыз 1997-ти арын юнматиз. Солэн авторъёсыз: Сергей Львович Бехтерев но Николай Быков.

Люкетъёсыз[Тупатыны | вики-текстэз тупатыны]

1934-тӥ арын Ижын куинь ёрос вал — Ждановской, Азинской, Пастуховской. Но 1960-тӥ арын соосты быдтӥзы. 1962-тӥ арын кылдӥзы выль вить административной ёросъёс: Индустриальной, Первомайской, Октябрь, Ленин но Устинов.

Административной ёрос Улӥсьёсыз (2015)
Индустриальной ёрос 118 973 адями
Ленин ёрос 124 653 адями
Октябрь ёрос 135 576 адями
Первомайской ёрос 126 179 адями
Устинов ёрос 136 643 адями

Калыкез[Тупатыны | вики-текстэз тупатыны]

1-тӥ толшоре 2015-тӥ аре Ижын 642 024 улӥсез вал. Пӧлазы вань 30 пӧртэм выжыысь калыкъёс: ӟучъёс — 69,4%, удмуртъёс — 17,2%, бигеръёс — 9,6%, музон калыкъёс — 3,8%.

Переписьёсъя Ижысь улӥсьёслэн лыдзы вошъяськиз тазьы:

Перепись ар 1897-тӥ 1926-тӥ 1939-тӥ 1959-тӥ 1970-тӥ 1979-тӥ 1989-тӥ 2002-тӥ 2010-тӥ 2012-тӥ 2013-тӥ 2014-тӥ 2015-тӥ
Улӥсьёс 41 000 62 200 175 600 285 300 422 200 549 900 634 700 632 200 627 700 629 500 632 900 637 300 642 000

Экономика[Тупатыны | вики-текстэз тупатыны]

Промышленность[Тупатыны | вики-текстэз тупатыны]

Ижкар — Удмурт Элькунлэн шоркарыз, Россиысь каръёс пӧлысь тужгес кужмоез. Татын нуналысь нуналэ ужало промышленностья 50-лэсь ятыр бадӟым предприятиос. Котькудӥз выре ас удысэзъя: машина поттон, пӧртэм тӥрлыкъёс-арбериос дасян, корт ӵыжатон но мукет.

1929-тӥ арын Ижын нырысьсэ пуктӥзы мартен, нош 1934-тӥ арын — ТЭЦ-1.

1930-тӥ арын кутскиз токарно-винторезной станокъёсты дасян. Быдӟым ож кутскытозь, ог 36 пумо станок кылдытэмын вал.

1932-тӥ арын карын бичаны ӧдъязы мотик. «Ижмашын», ГП «Механический заводын» лэсьтылӥзы машина, мотоцикл, спортлы но пӧйшуранлы чаклам ыбылӥськон тӥрлык. «Ижсталь» заводын дасяллязы 90 сюрслэсь трос пӧртэм корт арбериос.

Бумага поттылӥзы «Буммашын». Та заводлэсь оборудованизэ ас ужазы кутӥзы пӧртэм кунъёс: Болгария, Франция, Чехия, Словакия, Польша, Китай но мукет.

«Аксион» огазеяськон нырысь мотик бичалляз, Быдӟым ож вакытэ басьтӥськиз «Максим» пулемётъёсты дасян борды. 1950-тӥ аръёсы удыссэ нош воштӥз - йӧнатӥськонлы, космослы чаклам аппаратъёс, магнитофонлы кассетаос лэсьтылӥз.

Ижысь «Радиозавод» но кутскиз ожгар тӥрлык, инэз эскеронъя приборъёс поттыны. 1966-тӥ арын завод огкыл тупатӥз Америкаысь «Моторола» огазеяськонэн. Озьы Радиозавод телефонъёс дасян борды кырмиськиз.

1908-тӥ арын усьтӥськем «Редуктор» ужан ӧрзэ герӟаз редукторъёс, мотоблокъёс бичанэн. Мувӧй кысконъя тӥрлыкъёс поттӥз «Нефтемаш». Химияя промышленностез валтӥз Пластмасс завод.

Азинске нюлэс промышленность но капчи промышленность. Кылсярысь, «Зангари», «Сактон» огазеяськонъёсын кильтро дӥсь вуро. Сиён-юон поттон удысын ӟеч тыршо «Ижмолоко», «Ново-Ижевский», «Ошмес», «Тазалык», «Гамбринус».

Вузкарон[Тупатыны | вики-текстэз тупатыны]

Вузкарон удыс Ижын ӝог азьланьтӥське. Али дыре Ижлэн вузкарон сетез пыртэ 2300 векчиен вузкаронэн предприятиез, 438 сиськон интыез, 4 базарез но 776 огдырлы ужась вузкарон интыез.

Трос аръёс ӵоже карын векчи вузэн товарооборот дугдылытэк будэ. 2013-тӥ арын со ӝутъяськиз 107,4 миллиард манетозь.

Карын туж трос сиён-юон вузан супермаркетъёс но гипермаркетъёс, компьютеръёсын вузкаронниос, сиськон интыос, фирменной вузкаронниос, вузкарись-шулдыръяськытӥсь комплексъёс но бизнес-центръёс ужалляло. Ижлэн рыноказ трос тодмо брендъёслэн вузкарон сетьёссы вань: «Ашан», «Лента», «Metro», «Карусель», «Магнит», «Эльдорадо», «М-Видео», «Корпорация Центр», «Уютерра», «DNS» но трос мукетъёсыз.

Со сяна, карын трос вузкарон интыос вань, кытын Удмуртиысь лэсьтӥсьёслэсь вузъёссэс басьтыны луоно.

Озьы ик общепит удыслэн пӧртэм секторъёсыз азинско. Ижын ресторанъёс ужало, кудъёсыз вылӥ ӟечлыко сиёнъёсты но юонъёсты пӧрало. Вань но ӝог сиськон понна туж трос кафеос, соос пӧлын дуннеысь тодмо сетьёс — Макдоналдс, «KFC», Subway, Southern Fried Chicken.

Дышетон[Тупатыны | вики-текстэз тупатыны]

Вылӥ дышетскон[Тупатыны | вики-текстэз тупатыны]

Ижын 4 кун вылӥ дышетсконниос интыяськемын:

  • Удмурт кун университет;
  • Ижысь М. Т. Калашников нимо кун технической университет;
  • Ижысь гурт возёсъя кун академия;
  • Ижысь эмтодос кун академия.

Озьы ик вань 6 кун вузъёслэн филиалъёссы но кунэн кузёяськонтэм 5 вузъёс.

Огъя дышетскон[Тупатыны | вики-текстэз тупатыны]

Удмуртилэн шоркараз 93 нуназе огъя дышетскон школаос ужало, соос пӧлын: 53 шоръёзо школаос, 12 огъя дышетсконниос, кытын мургес дышетоно нимаз предметъёс вань, 4 гимназиос, 12 лицейёс, 1 валтӥсь школа, 10 нимаз (тупатъян) школаос, 1 огъя типъем школа-интернат. Озьы ик вань 4 ӝытазе (сменной) огъя дышетсконниос.

2013-тӥ арын Ижысь школаосын дышетскисьёслэн лыдзы йылӥз 62 989 адямиозь.

Школаозь дышетскон[Тупатыны | вики-текстэз тупатыны]

Ижын 213 школаозь дышетсконниос интыяськемын.

Транспорт[Тупатыны | вики-текстэз тупатыны]

Иж кар — Удмуртиысь бадӟым транспортной герд (узел).

Ижкар автобус

Мерлыко транспорт. Карын 11 трамвай, 8 троллейбус но 38 автобус маршрутъёс вань. Валтӥсь выжтӥсьёс луо «ИжГорЭлектроТранс» МУП (трамвайёсты но троллейбусъёсты обслуживать каре) но «ИПОПАТ» ОАО (автобусъёсты обслуживать каре). Озьы ик кӧня ке мосъем предприятие вань. 30-лэсь но уно пригородной дача автобус маршрутъёс арлы быдэ тулысэн-гужемен ужало.

2010-тӥ арысен пассажиръёс транспортной картаен мынонэз тырыны быгато. 2014-тӥ арысен мерлыко транспортэн огпала мынон сылэ 17 манет.

Чугун сюрес транспорт. Ижевск станцилэн вокзалэз — Ижкарлэн валтӥсь чугун сюрес ӟезьыез. Озьы ик кык чугун сюрес станция карын ужа — Заводской но Поӟым. Соос интыяськемын промышленной ёросъёсын.

Автомобиль транспорт. Иж кар пыр Е 22 автомобиль сюрес кыстӥське. Озьы ик куинь бадӟым сюресъёс Ижкарын кутско асьсэлэсь маршрутъёссэс: Р320 — Алабгоысен Ижозь, Р321 — Ижысен Глазозь но Р322 — Ижысен Сарапулозь.

Со сяна Иж кар герӟамын автобус сюресъёстӥ таӵе каръёсын: Кузон, Уфа, Пермь, Екатеринбург, Оренбург, Челябинск, Самара, Чебоксары но трос мукетъёсыз. Шор автовокзал но лымшор автостанция карын ужало.

Лобан транспорт. Иж карын одӥг нимъем аэропорт вань. Со Дэри черкогуртлы матын интыяськемын. Ижевск аэропорт луэ Удмуртиысь одӥг гинэ аэропорт. Валтӥсь но одӥг гинэ аэродромен кивалтӥсь компания луэ «Ижавиа» авиакомпания. Аслобетъёс лобалляло Ижысен Мускоозь, Восьбуро Петыркар]]озь, Пермёзь, куддыръя Кузон, Сочи, Анапа, Баку, Ереван дорозь.

Ву транспорт. Гужембыт Иж тымет вылын шур трамвайлэн маршрутэз ужа «Ижевск» пыжвозьманысен «Воложка» пыжвозьманозь. Та маршрут кивалтӥське «ИжГорЭлектроТранс» МУП-эн.

Сӥё-дано адямиос[Тупатыны | вики-текстэз тупатыны]

Ижкарлэн дано адямиосыз:

но мукет.

Галерея[Тупатыны | вики-текстэз тупатыны]

Чӧлсконъёс[Тупатыны | вики-текстэз тупатыны]