Байметов, Александр Кальманович

Википедиысь материал
Александр Кальманович Байметов
Ужан удысэз: тодосчи, психолог, педагог
Вордӥськем нуналыз: 30-тӥ пӧсьтолэзе 1938(1938-07-30)
Вордӥськем интыез: Удмурт Можга гурт, Вавож ёрос, УАССР, РСФСР, СССР
Кулон нуналыз: 12-тӥ гудырикошконэ 2016(2016-08-12) (78 арес)
Кулон интыез: Иж кар, Удмуртия

Алекса́ндр Ка́льманович Байме́тов — учёной-психолог, педагог, педагогика удысын менеджер. Психологи наукаосъя кандидат. «Отличник народного просвещения РСФСР» (1987), «Заслуженный работник народного образования Удмуртской Республики» (1999) нимо дано нимъёсты басьтӥз.

Вордскемын 1938 аре 30 пӧсьтолэзе Удмурт АССР-ысь Вавож ёросысь Удмурт Можга гуртын. Будэмын Бигер республикаысь Кукмор ёросысь Выль Канисар гуртын.

Ижысь педагогикая училищеын дышетскиз. Вылӥ дышетскемзэ басьтӥз Удмурт педагогикая институтын, историяя но филологияя факультетын. Нырысь ужаз удмурт но ӟуч кылъя, литературая дышетӥсь луыса. Психологияя аспирантуразэ пырпотӥз Пермь карын. Отысь бертэм бераз 1968 арысен ужаз Удмурт педагогикая институтын (1972 аре со луиз Удмурт кун университет) психологияя но педагогикая кафедраын старшей преподаватель но доцент луыса. 1976—1982 аръёсы та кафедраен кивалтӥз.

1984 арысен 2003 арозь ужаз Удмуртиысь дышетӥсьёслэн тодон-валанъёссэс будэтонъя институтын. Отын 1984—1986 аръёсы — национальной школаын ӟуч кылэз но литератураез дышетонъя кафедралэн кивалтӥсез, 1986—2003 аръёсы — педагогикая но психологияя кафедралэн кивалтӥсез вал.

А. К. Байметов вал усто администратор, лектор, учёной. Туж трос кужымзэ понӥз со Удмуртиысь школаосын психологияя службаез азинтонын. Наука ужъёсыз огъя но арлыд психологи удысысь ужпумъёслы сӥземын вал.

Кулэмын 12 гудырикошконэ 2016 аре Ижын.

Линкъёс[Тупатыны | бамлэсь кодзэ тупатоно]