Верещагин, Григорий Егорович

Григорий Егорович Верещагин
Ужъёсыз:	краевед, прозаик, кылбурчи, этнограф но православный священник
Вордӥськон нуналэз:	11-тӥ коньывуонэ 1851({{padleft:1851|4|0}}-{{padleft:10|2|0}}-{{padleft:11|2|0}})
Вордӥськон интыез:	Полом, Глаз утем, Ватка губерния, Российской империя[d]
Кун:	Российской империя[d]  СССР
Кулон нуналэз:	27-тӥ гудырикошконэ 1930({{padleft:1930|4|0}}-{{padleft:8|2|0}}-{{padleft:27|2|0}}) (78 ар)
Кулон интыез:	Иж, Горьковский край[d], РСФСР, СССР

Та авторлэн произведениосыз Викитекаын вань. → Григорий Егорович Верещагин

Григорий Егорович Верещагин (куд-ог документъёсын Георгиевич но гожтэмын) — удмурт писатель-этнограф, югдытӥсь, баӵко. Вордӥськиз 11-тӥ октябре 1851-тӥ арын туала Кез ёросысь Полом гуртын. Сарапулысь реальной училищеез йылпумъяса, Льӧльшур гуртын усьтӥз земство школаез но отын дас ар ӵӧже дышетӥсь луыса ужаз. Льӧльшурын сяна, тодон-валанзэ нылпиослы пыӵатыны выриз Сарапул уездысь ик Шаркан, Сосновка, Брангурт черкогуртъёсын.

1900-тӥ арын улыны выжиз Брангуртэ. Отысь черке ужаны интыяськиз (баӵко ужлэсь со куштӥськиз 1920-тӥ аръёсы). Григорий Егорович но солэн кузпалыз берпуметӥ нуналъёссэс ортчытӥзы ини Ижын Николай пизы дорын. Сюлэмыз кутыса, Верещагин улонысь кошкиз 27-тӥ августэ 1930-тӥ арын. Шаерысьтымы огаз гинэ газетаз — Гудыриын — со сярысь ивортэмын вал.

Наука удысын Верещагин нырысетӥ вамышъёссэ лэсьтӥз Льӧльшур школаын ужакуз ик. Этнографиен герӟаськем трос материалъёс люкаса, Санкт-Петербургын печатлаз Вотяки Сосновского края (1886) но Вотяки Сарапульского уезда Вятской губернии (1889) монографиоссэ. Императорлэн географияя ӟуч обществоез (ИРГО) та ужъёсыз понна Григорий Егоровичез азвесь медален пусйиз. Озьы Верещагин та обществолэн членэз луиз. 1896-тӥ арын Верещагин поттэ О книгах на вотском языке брошюразэ, отын со выль алфавит ӵектэ удмуртъёслы (улонэ пыӵатэмын ӧй вал).

Литература удысын ужаны кутскиз бергес. Трос учёнойёс (Кедра Митрей, П. К. Поздеев, П. П. Домокош, В. М. Ванюшев, Т. Г. Владыкина но мукетъёсыз) малпало, Верещагинлэн 1889 аре потэм «Вотяки Сарапульского уезда» монографиысьтыз кылбур — нуны веттан гур «Чагыр, чагыр дыдыке» — ӵапак Верещагинлэн аслаз гожтэм кылбурез вылэм шуыса, но со ик кылбур, пе, инъет выллем луиз удмурт чеберлыко литературалы (озьы 1989-тӥ арын Москваын нырысьсэ пусйизы удмурт литературалэн кылдэмез дырысен 100 ар тырмонэз). Мукет учёнойёс (Р. Ш Насибуллин, А. Г Шкляев,А. Г. Красильников, Д. М. Сахарных) соин но, таин но соглаш ӧвӧл. Котьма ке но, 1924-тӥ арын кылбуръёсыз печатласькизы Гудыри газетын но Кенеш журналын; Бернат Мункачи пусъе, Верещагин, пе, туж усто кылбуръёс гожъяны быгатэ вылэм, солэсь, пе, та кылбуръёсты коньдонэн вузаны куризы, но со, пе, вузамтэ (жаль, пусъемын ӧвӧл, кыӵе кылын со кылбуръёсыз гожтэмын вал). Кылбур чуръёссэ озьы ик шедьтыны луиз Руководство к изучению вотского языка научно-методической ужысьтыз. Верещагин гожъяз выжыкылъёс-поэмаос но: Зарни чорыг, Батыр дӥсь, Скоробогат-Кащей. Ӧз палэнскылы очерк жанрлэсь — Общинное землевладение у вотяков Сарапульского уезда очеркез сӥземын удмурт калыклэн сямъёсызлы-йылолъёсызлы.

Этнографлэн ужъёсыз берыктэмын ӟуч, бигер, мадьяр, финн, эстон кылъёсы. Г. Е. Верещагинлэсь творчествозэ котыр ласянь эскериз кылбурчи Василий Ванюшев. Вань на Денис Сахарных историклэн Верещагинлы сӥзем статьяосыз.