Медведев, Григорий Сергеевич

Википедиысь материал

Григорий Сергеевич Медведев (Татарстан, Балтаси ёрос, Лöзя гурт 1904 — Магадан, Берлех посёлок 1938) — удмурт прозаик, удмурт литературае чылкак выль сямен гожтэм нырысетü бадӟым романэн — «Лӧзя бесмен» трилогиен но фантастика вылын гожтэм «Выль дунне» веросэн ноку вунонтэм пытьы кельтüз.

Григорий Медведев вордскиз 1904 арын Малые Лызи черкогуртын (туннэ Татарстанысь Балтаси ёрос) шоро-куспо улӥсь крестьян семьяын. Со дышетскиз земской но средней школаын. 1922—1925 аръёсы дышетскиз Можга педтехникумын. Соку ик гожъяны но кутске. 1927—1929 аръёсы «Гудыри» газетын но «Кенеш» журналын пото писательлэн нырысь веросъёсыз. Соос пӧлын таӵе веросъёсыз: «Ярдурын», «Выль улон лэсьтӥське», «Выль дунне», «Лёва Матран», «Лулпыжет». 1929—1930 аръёсы Г. С. Медведев печатла веросъёсын но очеркъёсын «Ез юбо кырӟа» но «Етӥн штурм» нимо сборникъёссэ.

Улон но ужан сюресэз[Тупатыны | вики-текстэз тупатыны]

Григорий Сергеевич Медведев вордüськиз 1904-тü арын 5-тü южтолэзе Лöзя (Малые Лызи) гуртын (туала Татарстанысь Балтаси ёросысь) трос нылпиё семьяын. Атаез Сергей Федотович но анаез Екатерина Прокопьевна сизьым нылпи будэтüзы. Лӧзяысь куинь классъем покчи ёзо школаын дышетскüз. Гришаез дышетüз Мария Емельяновна Филиппова. Со витьтон ар ужаз Лӧзя школаын, кема аръёс ӵоже тыршемез понна Ленин орденэн пусъемын. 1919-тü арын Г.Медведев Алабгоысь (Елабугаысь) епархиальной училищелэн ньыль аръем педагогической курсаз дышетскыны пыриз. Кыкетü курсысен, Колчак вуэмен, дышетсконзэ куспетü кароно луиз. 1922-тü арын Казаньысь рабфаке пыриз, но ӝоген отысь кошкиз.

1922—1925-тü аръёсы Григорий Медведев Можга педтехникумын дышетскиз. Татысен ик гожъяськыны но кутскиз. Уката ик пияш веросъёс гожъян борды басьтüське. 1925-тü арын лыдӟисьёс доры вуэ нырысетüез произведениез — «Берпум вуз» веросэз. Потüз со «Гудыри» газетын. Педтехникумез йылпумъяса, Г. С. Медведев Можга ёросысь Бадӟым Кибья школаын ужаз. 1928—1929 аръёсы Григорий Сергеевич Шарканысь ШКМ-ен (крестьян егитъёслэн школаенызы) кивалтиз. Со сяна кружокъёс усьтüз, футбол команда кылдытüз, куасэн бызьылонъёс ортчытъяз. Татысен Григорий Медведев улонзэ ӟуч дышетüсен Клавдия кирилловнаен герӟа. Соослэн Эмилия нылзы вордüське. 1929-тü арлэн пумазгес Г.Медведев «Гудыри» газетлэн редакцияз ужаны кутске, сельхозотделэн но литература но искусство люкетъёсын кивалтэ, ачиз но трос гожъяське. Трос гуртъёсы потано луэ, коллективизацилэн улонэ пыӵамез сярысь гожъя. Малпанъёссэ-чакланъёссэ егит автор очеркъёсаз но веросъёсаз усьтэ. («Ез юбо кырӟа» — 1930; «Етӥн штурм» — 1932). Удмурт пединститутлэн ӝыт ужась ёзэтэз усьтӥськем бере, Григорий Сергеевич кылъя но литературая факультетэ дышетскыны пыре. 1932-тӥ арын Г.Медведев писательёслэсь огазеяськонзэс радъян понна оргкомитетын ужаны кутске, берло сое прозая секцие кивалтӥсе быръё. Кык ар ортчыса писательёслэн съездазы пыриське. 1932—1936-тӥ аръёсы тырше «Лӧзя бесмен» трилогиез бордын. 1935-тӥ арысен со быдэсак выже литература уже. Писательлэн мукет творческой малпанъёсыз ӧз быдэсме. Егит писатель 1938-тü арын 4-тü куартолэзе тюрьмае пукто но лагере келяло. Нош 20-тü шуркынмонэ со Магаданысь Берлех посёлокын быре.


Wiki letter w.svg
Та статьяез яке солэсь люкетсэ кулэ викифицировать карыны.
Быгатӥськоды ке, тупатэ вал сое википеди правилаосъя но валэктонъёсъя.