Борисов, Трофим Кузьмич
| Трофим Кузьмич Борисов | |
| Ужан удысэз: | |
|---|---|
| Вордӥськем нуналыз: | |
| Вордӥськем интыез: | |
| Кулон нуналыз: |
4-тӥ инвожое 1943 (51 арес) |
| Кулон интыез: | |
Трофим (Трокай) Кузьмич Борисов — публицист, филолог, этнограф. Вордӥськиз 18-тӥ (30-тӥ) шуркынмонэ (ноябре) 1891-тӥ арын Алнаш ёросысь Кизекгуртын. Дышетскиз гуртысьтыз земской школаын. Тодон-валанзэ муромытӥз на Алнаш черкогуртысь 2 классъем школаын, Алабгоысь но Кузонысь техникая училищеосын. Таин гинэ кӧтыз уг тыры — 1912-тӥ-1913-тӥ аръёсы пыре Вӧсьбуро Петыркарысь историяя но филологияя факультетэ. 1914-тӥ-1916-тӥ аръёсы визь песьтэрзэ узырмытэ ини Кузонысь университетысь эмтодосъя факультетын.
1917-тӥ арын, дышетсконзэ йылпумъямез бере, Борисовез келяло Минской фронтэ. Отысь госпитальын эмъясь луыса ужа, дурбасьтэ большевикъёс пала. Совето властез кылдытонэ мыло-кыдо пыриське. 1918-тӥ арын ожмаське Украинаын, со арын ик бертэ дораз. Отын сое быръё Алабго уездлэн исполкомысьтыз депутатъёслэн кенешсылэн тӧрое. Алабгоын большевикъёслэсь ячейказэс кылдытэ.
31-тӥ коньывуонэ (октябре) 1918-тӥ арын Трофим Борисов кивалтэм улсын «Гудыри» иворбамлэн (газетлэн) нырысетӥ номерез потӥз. Нош 1919-тӥ арын Сарапул карын со радъяз Вань удмурт крестьянъёслэсь съездзэс. Отысен ик калык сое бырйиз комиссаре — Центральной комиссариатысь удмуртъёсын герӟаськем ужпумъёсты сэрттӥсе-пертчисе. Но яркыт малпанъёссэ быдэстыса уг вутты — 1922-тӥ арын сое янгыше уськыто сепаратизм мылкыдъёсыз понна. 1923-тӥ арын Борисовез партиысь но, ужысьтыз но улляло. 1928-тӥ арын Трофим Борисовез вить арлы пытсэт сьӧры — Сыктывкаре — келяло.
1931-тӥ арын кошке Муское, дышетскыны пыре аспирантурае. Со вие ик ужа Муско дорысь пичи карын эмъясь-венеролог луыса. 14-тӥ толшоре (январе) Т. Борисовез янгыше уськыто «СОФИН» ужъя. Таяз радэ кечато-вамато укно сьӧрын со пукиз 1936-тӥ-1938-тӥ аръёсы Иркутск палъёсын. Но та бӧрсьы но пиосмуртлы маза уг сёто — 1940-тӥ арын со нош арест улэ шеде. Трофим Борисовез шонере потто 20-тӥ куарусёнэ (сентябре) 1989-тӥ арын гинэ. Та ласянь авторлы бадӟым юрттэт сётӥз, шуыны луоз, удмурт профессор К. Куликов но Калмыкиысь калык кылбурчи Д. Кугультинов.
Пусъёно: Вӧсьбуро Петыркарын дышетскыкуз, Борисов мыло-кыдо выриз этнографиен, лингвистикаен, фольклорен. Гожтэт пыр кусып возьылӥз тодмо ӟуч тодосчиен Д. К. Зеленинэн. «Гудыри» иворбамлы (газетлы) редактор луэмез бере кутскиз литература удыс борды. Гожъяз кылбуръёс, листовкаос, этнографилы сӥзем очеркъёс, брошюраос. 1921-тӥ арын поттӥз «Грамматика вотского языка», 1929-тӥ арын «Песни южных вотяков», 1932-тӥ арын «Удмурт кыллюкам» лыдзетъёссэ. Та сяна, дасяз «Удмурт стихотвореняос»,«Удморт кылбуръёс» (1919) антологиоссэ. 1921-тӥ арын, кылбурчиен Кузебай Гердэн валче кариськыса, радъязы Удмурт гожъяськисьёслэсь нырысетӥ съездзэс. Т. Борисов кужымзэ, визьзэ сётӥз на «Кенеш» журналэз кылдытонлы но.
Улонысь кошкиз 4-тӥ инвожое (июне) 1943-тӥ арын Актюбинск лагерьын (Узбекистанысь Чимкент карын).