Чутыр
| Черкогурт
Чутыр
 57°23′28″ с. ш. 53°14′53″ в. д.HGЯO
| ||||||||||||||||
  Чутыр |
Чутыр (ӟуч Чутырь) — Удмуртиысь черкогурт. Эгра ёросын со одӥгез тужгес вашкалаез луэ. Ваньмыз сямен, Чутырез «Пельнянь» инты шуыса тодо. Малы ке шуоно, сюрес вылэ интыяськем сиськонни кемаласен гочатэ аслаз ческыт пельняненыз[2].
Интыяськемез
[Тупатыны | бамлэсь кодзэ тупатоно]Чутыр черкогурт кылдэмын 1689 арын[3]. Интыяськемын Нязь шур дурын. Шурлэн юн читыръяськыса быземеныз гуртэз Чутыр нималлям («читыр-чутыр бызе»). Интыяськемын кунлэн шораз, «Ижкар — Эгра — Глазкар» Р321 сюреслэн 69-тӥ иськемаз, «эксэй сюрес» вылын (ӟуч сямен вераса — «государева дорога»). Эгра посёлоклэсь лымшорен шунды ӝужан вискын ог 21 иськеме[4] пуксемын.
Тунсыко интыосыз
[Тупатыны | бамлэсь кодзэ тупатоно]Истори ласянь та гурт туж тунсыко луэ. Нырысь ик: Вознесенской нимо черк. Со дас ар ӵоже пуктӥськем (1819—1829). Солэсь азьпал та интыын пу черк сылэм (1752)[5]. Выль черклэн усьтӥськемез дырысен ик татын службаос ортчытъяз но калык пӧлын дышетон уж нуиз протоиерей Василий Андреевич Курбатов-Раевский. Кузпалыныз ӵош усьтӥллям крестьян нылпиосты дышетон юрт, черкын кырӟась хор, черк котыре мерттӥллям эмъюм будосъёсын сад, заводиллям муш бакча. Ачиз Василий Андреевич першал луыса, гурт калыкез эмъям. Али дыре «Поповский сад» нимо сад-бакчаез утён ужъёс мыно.
Озьы ик тунсыко «баӵко юртлэн» (поповский дом) историез. Сое 1800 арын черк вӧзы ӝутӥллям. Вӧл-вӧл бадӟым 12 укноосын, ньыль палдурысо липетэн, кор борддоръёсыз пулэн шуккемын, огпал липет вылаз коръёслэсь ик пичияк висъет ӵыпемын — мезонин. 1824 арын, кузь сюрес вылын шутэтсконъяз, та юртын изёно луэм Александр I эксэй. Со сяна, Чутыр черкогурт пыр потэмын тодмо ӟуч гожъяськись Василий Жуковский.
Граждан ожъёс мыныку, со юртлэн борддорез, снаряд шедьыса таркаськем. Со вакыт отын Володарской полклэн штабез интыяськемын вылэм. Собере — волостной правленилэн исполкомез. Быдӟым Отечественной война аръёсы татчы Ленинград улосысь Муромысь нылпи сад выжтэмын вылэм. 1985 арын та юртэз пулы сутӥллям.
Гуртлэн кылдэмез но соин герӟаськем интыос сярысь пыр-поч гожтэмын Чутырысь краеведлэн Динарида Волковалэн книгаяз[6].
Улӥсез
[Тупатыны | бамлэсь кодзэ тупатоно]Чутырын нырысь улӥсьёс удмуртъёс вылӥллям. Берлогес Киров улос котырысь но мукет интыосысь вуыса, ӟучъёс каръяськиллям.
Кедра Митрейлэн «Дитя больного века» автобиографической повестяз пыртэм персонажъёс пӧлын Чутырын улӥсьёс но вылӥллям[7].
Трос тодмо адямиос вордскемын но будэмын Чутыр музъем вылын. Одӥгез соос пӧлысь Колчаклэн прапорщикез Дмитрий Константинович Анисимов. Со ик Австралиысь нырысетӥез ӟуч библиотекарь но нырысетӥ ӟуч правосланой приходлэн регентэз[8].
2023 аръя улӥсьёслэсь лыдзэс чакласа, Чутыр черкогуртын 832 адями лыдъяське. Соос пӧлысь: 6 аресозь нылпиослэн лыдзы — 83 мурт, 7 аресысен 17-озь — 98 мурт, 18 аресьем егитъёс 29 аресозь — 100 адями, 30 аресысен 60-озь — 358 адями, 60 аресысен но мӧйыгес — 181 мурт, 80 арес но солэсь кемагес улӥсьёслэн лыдзы — 12 мурт[9].
Валэктонъёс
[Тупатыны | бамлэсь кодзэ тупатоно]- ↑ Каталог населённых пунктов Удмуртской Республики. Численность постоянного населения на 1 января 2012 года
- ↑ Пельменный маршрут по Игринскому району
- ↑ С юбилеем, Чутырь
- ↑ Чутырь.
- ↑ К 190 летию храма Вознесения Господня села Чутырь Игринского района.
- ↑ Волкова Д. Г. Сторона моя родная. Между Нязью и Лозой. Текст на русском и удмуртском языках. Ижевск, 2020 г. 367 с., ил.
- ↑ Долгими дорогами Кедра Митрея
- ↑ Прапорщик Колчака из Удмуртии-первый русский регент и первый русский библиотекарь в Австралии. Людмила Ларкина
- ↑ Население села Чутырь Игринского района Удмуртской Республики
.svg)
.svg)