Яр ёрос

**Яр ёрос**
	Герб
Центр	Яр
Улӥсьёс
- ваньмыз	18 097
- плотность	11,9 адями/км²
Территория
- ваньмыз	1524,3 км²

Удмуртиысь ёрос. Центрез — Яр.

Географиез

Яр ёрослэн быдӟалаез — 1524,3 квадрат иськем. Интыяськемын Красногорской но Верхнекамской вырйылын.

Бускельёсыз — Удмурт шаерысь Глаз но Юкамен ёросъёс, Киров улосысь Фалёнки ёрос но Омутнинск ёрос.

Ёрос пыр ортчо таӵе шуръёс — Ватка, Чупчи, Тум, Моя, Чур, Лёкма.

Ёрослэн кылдэмез

Яр ёрос кылдытэмын 1929-тӥ арын 15-тӥ июне. Отчы пыризы Глазов уездысь Укан, Ежево но Пудем волостьёсысь 19 сельсоветъёс. Ёрослэн администрациез интыяськиз соку Укан черкогуртын, нош 1932-тӥ арын ёрослэн центрез выжтэмын кар типъем Яр посёлоке.

1935-тӥ арын 23-тӥ январе Яр ёрослэсь висъяськиз Пудем ёрос. 1956-тӥ арын 23-тӥ ноябре та ёрос быдтэмын вал, отчы пырись сельсоветъёс берыктэмын Яр ёросэ.

1962-тӥ арын Яр ёрос быдтэмын, отчы пырись сельсоветъёсыз люкемын Глазов гурт ёрос но Глазкар куспын.

1964-тӥ арын кылдытэмын Яр гурт ёрос, отчы пыриз 7 сельсовет но 2 поссовет, ӵапак соослэсь ик 1965-тӥ арын кылдӥз Яр ёрос.

Калык

Яр ёросын улӥсез — 17 сюрс 984 адями (2009-тӥ арлы). Со пӧлысь 6 сюрс 922 мурт улэ кар типъем Яр посёлокын. Удмуртъёс — 68,5 %, ӟучъёс — 29 %, бигеръёс — 1 %, бесерманъёс но мукет калыкъёс — 1,5 %.

Удмуртиысь 25 ёрос пӧлысь калыклэн лыдызъя Яр ёрос 15-тӥ интыын.

Кивалтон

Кун власть быдэсъяське Яр ёрослэн Уставезъя. Сое быдэсъяло таӵе ёзъёс:

1. Ёрос депутатъёслэн кенешсы — отчы пыре 30 депутат, соос бырйисько 5 арлы. Туала кенеш быръемын 2006-тӥ арын 8-тӥ октябре.

2. Муниципал кылдытэтлэн тӧроез — сое быръе нимысьтыз кылдытэм Кенеш. Та ужез быдэсъя Комсомольское округъя потэм депутат Сергей Иванович Литвяков.

3. Муниципал кылдытэтлэн администрациезлэн кивалтӥсез — Николай Андреевич Дёмин.

Экономика

Ёросын ужа нюлэс дасянъя Пудем завод, етӥн сэстонъя фабрика, кирпич шуккон завод.

Ёросын ужзэс радъяло 15 гурт хозяйствоос. Соос будэто бакча емыш, ю-нянь, картош. Ёросын потто сӥль, йӧллэсь сиён-юон. Ужзэ радъя «Эра» агрофирма, отын будэто пӧртэм выжыысь пудо.

Пудем пыр ортче Яр-Ижевск поезд.

Культура

Ёросын усьтэмын 17 школа (со пӧлысь 9-эз шор ёзо), Искусствоосъя нылпи школа, Спортъя школа, 14 нылпи сад. калыкез пӧртэм удыслы дышето Ярысь политехникум но Ярысь школа-интернат.

Калыкез эмъяло ёрос больницаын но 24 фельдшер-акушер пунктын.

Яр ёрос узыр Чупчи культураысь синпелетъёсын. Кылсярысь, Учканар, Чибинькар, Поркар. Яр ёросысь Елово гуртын сылэ Троицкой, Укан селоын Спас но Сада гуртын Вознесение черкъё.

Яр ёросын кутсконзэ басьтэ Ватка шур, озьы ик Тум гуртын интыяськемын гыбедэн узыр инты.

Ёросын потэ «Сельская правда» газет.

Со сяна, учке

Ӟакагурт