Сарапул

Кар Сарапул Флаг Герб Башенинлэн дачаезo 56°28′ с. ш. 53°48′ в. д. Шаер Россия Улос Удмуртия Йыр Александр Ессен Кылдытон дыр 1621 Территория 86,01 км² Шорлэн ӝуждалаез 80 м Улӥсьёс (2014) 99 869 адями Часовой пояс UTC+4 Телефон код +7 34147 Почта индексъёс 427960 - 427980 Автомобиль код 18 Официальной сайт adm-sarapul.ru (ӟуч)

Сарапул

Сарапул ВикиCommons-ын

Сарапул — Удмуртилэн лымшор палаз интыяськем кар (2002 аре — ог 103 сюрс улӥсьёс). Интыяськемын Кам шурлэн бур палаз. Ижысен Сарапулозь — 63 километр.

1924-тӥ арысен 1991-тӥ арозь Сарапул ёрослэн центрез вал.

Историез

Сарапул ним XVI даурысен тодмо луэ. 1596 аре калыкез лыдъян книгаын гожтэмын: «Кузон утемын, Кам шур йылынгес... Сарапулысь но Сиваысь чорыг кутыло». Кызьы адӟиськомы, ӵапак кар сярысь татын вераськон уг на мыны: Сарапул шуыса Кам шурлэн оглюкетэз нимамын, шӧдске.

Сарапул нимлэсь кытысь потэмзэ ӵемысь герӟало чорыг кутонэн: чуваш кылын сарă пулă ‘ӵуж чорыг’ (Acipenser gueldenstaedtii) шуэмез возьматэ.

Ӵуж чорыг

Вуоно карлы Вознесенской черкогуртэз кылдытэмен инъет сётэмын вал. 1621 аре дозорной книга «Сарапул дурын Вознесенской черкогурт» сярысь вера. Берло ини Вознесенской черкогурт Сарапул нимо дворцовой слободае пӧрмиз. 1780 аре Екатерина II косэмъя Ватка наместичество кылдытэмен Сарапуллы кар статус сётэмын вал.

1781-тӥ арын городлэн аслаз гербез кылдӥз. 1790-тӥ аръёсы Сарапулэн кивалтӥз секунд-майор А. В. Дуров — кавалерист-нылмурт Надежда Дуровалэн атаез.

1924 арозь Сарапул но Сарапул утем Ватка губерняе пыро вал. Со вакытэ татын улӥз-вылӥз 4 сюрс котыр адями. Город узыр ӧй вал. Ульчаосын сылӥзы 1 из собор, 1 приходской черк, 1 старообрядческой часовня, 48 лавка. 19 корка излэсь ӝутэмын вал, кылемез ваньмыз пулэсь.

1930 арозь Сарапул Урал улосэ пыре (Сарапул округ), 1939 арозь со Киров улосэ пыре (Сарапул ёрос), нош собере Сарапул ёрос Удмуртиен огезеямын вал.

18-тӥ дауре Сарапулын азинскыны кутске ку дасянъя промышленность. 1815-тӥ арын 5 сыӵе завод ужам. Ӧжыт улыса, усьтӥськиз майтал кисьтонъя огазеяськон. 1855-тӥ арын кирпич шукконъя 6 завод ужзэ мытӥз. XX-тӥ даурлэн кутсконаз отын промышленностья трос огазеяськонъёс усьтӥськизы. Кылсярысь, «Кожевенный завод и фабрика ручной и механической обвуи. Торговый дом Ф. Г. Пешехонова», «Барабанщиков Ник. и племянники. Торговый дом. Кожевенный завод и фабрика обуви», «Братья Кривцовы» но мукет.

Сарапуллэн шораз ик интыяськиз Вознесенский собор. 1812-тӥ арын со котыре пуктӥзы судьяослы, Дуровлы коркаос, кык этажъем юртъёс (соослэсь нырысетӥ этажзэс вуз карон интылы пӧрмытъязы).

1875-тӥ арын городын кылдӥз Благотворительной общество. Анай-атайтэк кылемъёслы, куанеръёслы соос усьтӥзы 20 сиськон инты. Та вакытэ ик ужзэс мытӥзы ясли но Ужлы сӥзем корка. Та коркан нылпиосты дышетӥзы киужлы.

Куазь

Сарапуллэн куазез
Показатель	Янв.	Фев.	Март	Апр.	Май	Июнь	Июль	Авг.	Сен.	Окт.	Нояб.	Дек.	Арбыт
Абсолютной максимум, °C	4,3	5,5	10,2	30,0	35,3	36,9	37,0	38,3	31,9	23,9	14,2	4,5	38,3
Шоро-куспо температура, °C	−12,1	−11,4	−4,8	4,3	12,3	17,6	19,5	16,6	10,8	3,8	−4,8	−10,4	3,5
Абсолютной минимум, °C	−47,4	−42,7	−35	−22,9	−11,3	−2,2	3,0	−0,1	−6	−20,9	−32,3	−48,3	−48,3
Зор-котлэн нормаез, мм	43	29	27	31	51	65	60	72	56	56	49	41	580
Источник: .

Улӥсьёс

Улӥсез — 101,4 сюрс адями (2010): ӟучъёс — 81,8%, бигеръёс — 8,9%, удмуртъёс — 3,8%, укаинецъёс — 0,9%, мукет выжыысь калыкъёс — 4,6%. 2017-тӥ арын лэсьтэм дунъянъя Сарапулын 98 сюрс пала адями улэ вал.

Транспорт

Сарапулысь вокзал

Сарапулын вань бадӟым порт. Кам шур кузя со Сарапулэз герӟа Улысь Новгород, Пермь городъёсын.

1916-тӥ арын городэ вуиз чугун сюрес. Кузонысен Екатеринбургозь ортчыса со андан магистраль меӵак герӟаз Россилэсь центрзэ Сибирен. Сарапулын усьтӥськиз нырысетӥ пу вокзал. 1981-тӥ арын пу вокзал интые туала из кык этажъем юртэз лэсьтэмын вал. Соку ик станциез электрифицировать кариллям. Туннэ Сарапул вокзалын трос кыдёке мынӥсь поездъёс но электричкаос дугдыло.

Городын вань мерлыко транспорт но. Кар автобусъёс 18 маршрутъя калыкез нуо-ваё. Озьы ик карлэн шораз автовокзал сылэ. Со автобус маршрутъёсын герӟа Сарапулэз Ижен, Пермен, Воткаен но трос мукет городъёсын, Сарапул ёросысь черкогуртъёсын.

Асфальт сюресъёсын кар герӟаськемын Удмуртилэн шоркареныз (Р322 трассаен), Камбаркаен но Нефтекамскен. 2016-тӥ арын ужаны кутскиз Кам вамен кема витем выж. Со капчиятӥз автомобилистъёслы Камбарка ёросэ но Башкирие сюрессэс.

Чӧлсконъёс

• Сарапул карысь официальной сайт (ӟуч)