Удмуртия

Удмурт Республика

Флаг Герб
Удмурт Республикалэн гимнэз
Официальной кылъёс	Удмурт кыл
Шоркар	Иж
Тужгес бадӟым каръёс	Иж, Сарапул, Вотка, Глаз, Можга
Удмурт Элькунлэн Тӧроез	Александр Соловьёв Виктор Савельев Владимир Невоструев
Территория • Ваньмыз • Вувыл	57-тӥ интыын 42 061 км² 0,6 %
Улӥсьёс • Дунъян (2015) • Плотность	1 517 294 адями (30-тӥ интыын) 36,07 адями/км²
Авиакомпания	Ижавиа
Интернет-домен	.udm.ru
Дырлэн зонаосыз	MSK+1 (UTC+4)

Удмуртия (мукет сямен Удмурт Элькун) яке Удмурт Республика (ӟуч Удму́ртия, Удму́ртская Респу́блика) — Россия Федерацие, Приволжской федеральной округысь улосъёс пӧлы пырись шаер.

Интыяськем

Удмурт шаер интыяськемын Шор Ураллэн шунды пуксён палаз, Кам но Ватка шуръёс вискын. Удмурт шоркарысен Мускоозь — 1 129 иськем, Санкт-Петербургозь — 1 904 иськем, Екатеринбургозь — 800 иськем, Кузонозь — 395 иськем.

Удмурт Республикалэн шунды пуксён но уйпал ласянь бускелез — Киров улос, шунды ӝужан палан — Пермь шаер, лымшор ласянь — Башкортостан но Татарстан элькунъёс.

Удмурт шаер интыяськемын 42,1 сюрс квадрат иськем музъем вылын, со Россия Федерацилэн муэзлэсь 0,25%-сэ басьтэ.

Удмурт шаере пыре 5 город, 25 ёрос, кар типъем 11 посёлок но 2119 гуртъёс. Шоркарез — Иж, отын улӥсез 611 сюрс адями (2009-тӥ арлы). Мукет каръёс: Вотка — 96,9 сюрс адями, Глаз — 97,1 сюрс адями, Можга — 49,7 сюрс адями, Сарапул — 98,8 сюрс адями.

Инкуазь

Чупчи шур

Удмурт шаер интыяськемын Шунды ӝужан пал-Европа равнина лэн шунды ӝужан палаз, Кам шур но солэн бур ӧрыз — Ватка — шуръёс вискын. Бадӟым зарезьёс Удмуртилэсь кыдёкын, соин ик омыр сокем чурыт ӧвӧл: толалтэзэ кезьыт но лымыё, гужемзэ пӧсь но шундыё. Тужгес но кезьыт толэзь — толшоре, (шоро-куспо температура Цельсийя — 9,9 градус) самой пӧсь толэзь — пӧсьтолэзь (шоро-куспо температура Цельсийя + 20,9 градус).

Музъем узырлыкъёс пӧлысь валтӥсьёсыз — нюлэс но мувӧй. Удмурт шаерлэн музъем вылаз усьтэмын мувӧй кысконъя 114 месторождение. Удмуртиын кыскем мувӧй пӧлысь 96%-эз уже кутӥське шаерлэн палэназ. Удмуртилэн 46% музъемез шобыртэмын нюлэсъёсын, со пӧлысь ӝыныез — лысо писпуос. Элькун узыр гыбедлы, азотнометановой интыослы, озьы ик эмъясь дэрилы но лэсьтӥськон сюйлы (луо, горд сюй, бур).

Удмуртилэн историысьтыз

Удмурт музъемез адямиос уже кутӥллям асьме эралэсь азьло VIII—V сюрсаре ини — мезолит вакытэ. Та сярысь иворто Удмурт Элькунлэн музъем вылаз шедьтэм археологияя синпелетъёс. Асьме вакытлэсь азьло VIII—III дауръёсы — корт дауре — Кама шаерын бадӟым гинэ кылдӥз ананьино лулчеберет. X даурын удмуртъёс пыризы Булгар шаере, нош XIII даурысен лымшор удмуртъёс Зарни Орда улын улӥзы, бӧрысь Кузон ханстволы пыриськизы. Уйпал удмуртъёс выжыяськизы туала Глазкар котыре (отысь тужгес тодмо археологи синпелет — Иднакар).

XVIII даурозь вашкала удмуртъёс выризы гурт удысэн, чорыг но пӧйшур кутылонэн. XIX даурлэн шораз Удмуртиын азинске корт поттон но ӵыжатон промышленность.

Быдӟым Октябрь революция дырозь Удмурт шаерлэн музъемез люкемын Кузон но Ватка губерниос куспын. Нимаз шаерлы Удмуртия пӧрмиз Октябрь революция бере гинэ.

1920-тӥ аре 4-тӥ шуркынмонэ В. И. Ленин кӧня ке выль автономи улосъёс кылдытон сярысь РСФСР-ысь ВЦИК-лэсь но СНК-лэсь постановленизэс юнматӥз. Со постановлениын верамын вал: «кылдытоно… ужась калыкъёслэсь — калмыкъёслэсь, поръёслэсь но вотякъёслэсь — автономи улосъёссэс». Озьы кылдӥз Вотяк автономи улос.

1932-тӥ аре 1-тӥ толшоре СССР-ысь ВЦИК-лэн постановлениезъя улосмылэн нимыз воштэмын вал: «Вотяк автономи улослэн коренной калыкез… удмурт калык луэ бере, …Вотяк автономи улослы выль ним сётоно: Удмурт автономи улос».

1934-тӥ аре 28-тӥ толсуре СССР-ысь ВЦИК «Удмурт автономи улосэз Удмурт Автономи Кенешо Социализмо Республикалы пӧрмытэм сярысь» постановленизэ кутэ. 20-ти куарусёнэ 1990-ти аре Удмуртиысь Выли Кенеш кун асэриклыклэн Декларациез юнматиз. Кун асэриклыклэн Декларациез 25-ти шуркынмонэ 2003-ти арын палэнтэмын.

11-ти коньывуонэн 1991-ти арысен Удмуртиысь Вылӥ Кенеш шаермылэсь выль нимзэ юнматӥз — Удмурт Республика.

Политика

Тӧролэн резиденциез Ижын

Удмуртиын кун власть быдэсъяське Удмурт Республикалэн Президентэныз, Правительствоен но Кун Кенешен.

Удмуртиен кивалтэ президент (2000-тӥ арысен — Александр Волков). Правительствоен кивалтэ Юрий Питкевич, улос парламентэн (Кун Кенешен) — Соловьёв, Александр Васильевич.

Удмурт Республика улонзэ радъя Россилэн валтӥсь законэз — Конституция — вылэ пыкъяськыса.

Ёросъёс

• Алнаш ёрос
• Балезино ёрос
• Вавож ёрос
• Вотка ёрос
• Глаз ёрос
• Грах ёрос
• Дэбес ёрос
• Завьял / Дэри ёрос
• Камбарка ёрос
• Каракулино ёрос
• Кез ёрос
• Кизнер ёрос
• Кияса ёрос
• Красногорск ёрос
• Можга ёрос
• Пичи Пурга ёрос
• Сарапул ёрос
• Сьӧлта ёрос
• Сюмси ёрос
• Ува ёрос
• Шаркан ёрос
• Юкаменск ёрос
• Эгра ёрос
• Якшур-Бӧдья ёрос
• Яр ёрос

Каръёс

• Вотка
• Глаз
• Иж
• Камбарка
• Можга
• Сарапул

Экономика

Удмуртилэн ӟеч интые интыяськемез луонлык кылдытӥз корт поттонэз азинтыны но Россиысь валтӥсь улосъёс пӧлы пырыны. Валтӥсь предприятиос: «Ижмаш», «Ижысь механикая завод», «Ижысь электромеханикая завод», «Радиозавод», «Ижсталь». Удмурт шаерын улэ быдэс дуннелы тодмо луэм конструктор М. Т. Калашников. Солы сӥзем музей шумпотыса пумита калыкез.

Со сяна, учке

• Удмуртиысь улон интыос

Чӧлсконъёс

• Официальное представительство Удмуртской Республики (ӟуч)
• Удмурт Элькунлэн Кун Кенешез (ӟуч)
• Центральный государственный архив Удмуртской Республики (ӟуч)
• Удмуртская литература. Прошлое, будущее, настоящее (ӟуч)
• Новости литературной жизни Удмуртии (ӟуч)
• Удмуртология. удмуртский научно-культурный информационный портал (ӟуч)